مشاكسات : جيم بن علي في تونس أوفر.. أوووووووووفر !

كلنا شاهدنا ثورة تونس..

وكلنا ذهلنا من النتيجة..

الشعوب أحرقت نفسها..

والحكومات حاولت عمل احتياطات "الحجْر الثوري"!

والقذافي أتى بالدر المنثور..

وأبو الغيط أكّد انتماءه لنفس المدرسة..



طب ما تيجوا نبص بس.. نبص بس!!

• الحكومات العربية تعاملت مع الثورة التونسية بطرق مختلفة.. بعضها دعم
  الأسعار وفتح الباب للحريات.. وبعضها شدّد عمليات القمع وفتّح عينيه..
  وبعضها نفى أساسا وجود ثورة في تونس!
  

• الحكومات العربية تخشى انتقال عدوى الثورة التونسية إليها.. خصوصا أن عدوى الشتاء خطييييييييرة.
  

• الزعيم الليبي حاول نصح التونسيين بأنهم لن يجدوا مثل بن علي.. وأكد
  لهم أنهم خسروا أفضل شخص يحكمهم.. أظن أن الليبيين نفسهم مووووت يخسروا هم
  كمان..
  

• حين أشعل مواطن النار في نفسه أمام مجلس الشعب قالوا إنه مختلّ عقليا..
  الحمد لله أنهم لم يقولوا إنه احترق بسبب ماس كهربائي، مش هيبقى كدب وذكاء
  يعني.
  

• فرنسا ترفض استقبال بن علي، وأوباما يؤكد وقوفه إلى جانب النضال
  التونسي، أكثر شيء يعجبني في دول العالم الحر هو ثبات مواقفهم.. ثبات ثبات
  فعلا..
  

• أبو الغيط يقول: "أما هؤلاء الذين يتصورون أوهاما ويضعون الكثير من
  الزيت فوق اللاشيء، فالزيت سيؤدي إلى اتساخ ملابسهم".. وطبعا وزارة
  الخارجية حريصة على ملابس المواطنين.
  

بين أصوات الهتاف الجماهيري الحاشد
أمام قصر الرئيس المخلوع، كان التليفزيون يعرض نهاية فيلم "شيء من الخوف"،
ودار هذا الحوار بين عتريس ورجالته:

• عتريس: الناس دي مش هتهدى؟
• رجالته: مش باين لهم يا عتريس.
• عتريس: طب اضربوهم بالنار.
• رجالته: هنضرب البلد كِلّاتها ولا إيه؟
• عتريس: يعني إيه؟
• رجالته: يعني إحنا مش قد الناس اللي بره دي.
•
عتريس: لا أنا عايز أعيش.. أنا لسه ما أخدتش إتاوات كفاية.. لسه يا دوب
ربع قرن في حكم البلد.. مش هيساعدني إلا فؤادة.. فين فؤادة؟
• رجالته: فؤادة أخدت طن ونص دهب وهربت يا عتريس.

ومن خلفه علا الهتاف.. الجيم أوفر.. أوووووووووفر.. الجيم أوفر.. أوووووووووووفر..

وحين كانت النار تأكل القصر كان عتريس يحلّق بطائرته الخاصة في الجو لا يدري أين يهبط.